'ہندوستانی مسلمان کیا سوچتے ہیں؟': ایک مطالعہ

سماجی تحقیق اور ریسرچ کے میدان میں ایک اہم پیش رفت کے طور پر "دا ابسولوٹ انسایٹ" ایک مطالعہ کے ذریعہ یہ سمجھنے کی کوشش کر رہا ہے کہ ہندوستانی مسلمان اپنے چند اہم مسائل کے بارے میں کس طرح سوچتے ہیں۔ ہندوستان میں یہ اپنی نوعیت کا پہلا مطالعہ ہے جس کے ذریعہ یہ سمجھنے میں مدد ملے گی کہ عام ہندوستانی مسلمان ان امور اور مسائل کے بارے میں کیا سوچ رکھتے ہیں جن کے تعلق سے ان کے قائدین، میڈیا ہاؤسز اور عام معاشرہ محض اپنے ذاتی خیالات اور تصورات کی بنیاد پر الگ الگ باتیں منسوب کرتے ہیں۔

ساتھ ہی ساتھ یہ اسٹڈی قائدین اور اصحاب اثر و رسوخ کو کمیونٹی کے بارے میں ٹھوس معلومات فراہم کرے گی جس کے ذریعہ انہیں صحیح سمت میں اپنی کوششیں جاری رکھنے میں اور وسائل کے بہتر استعمال میں مدد ملے گی۔ مذکورہ بالا سمجھ اور فہم کی عدم موجودگی کی وجہ سے عموما سماجی اور دینی تنظیمیں اور ادارے معلومات پر مبنی فیصلہ سازی نہیں کر پاتے اور ان کی منصوبہ بندی بنیادی طور پر انفرادی ترجیحات اور پسند و ناپسند پر مبنی ہوتی ہے۔ اس صورتحال کی وجہ سے مطلوبہ نتائج کے حصول میں عموما ناکامی ہاتھ لگتی ہے، کیونکہ مسائل سے نپٹنے اور مطلوبہ اصلاحات کے نفاذ کے لئے سب سے پہلے حقیقی مسائل کا ادراک ضروری ہے۔

اس اسٹڈی کے پہلے مرحلہ میں مختلف اہم امور پرعام ہندوستانی مسلمانوں سے معلومات حاصل کی جائیں گی۔ اس میں ہندوستانی مسلمانوں کے مختلف سماجی و اقتصادی گروہوں، مختلف خطوں میں رہائش پذیر اور مختلف مکتب فکر سے تعلق رکھنے والے مسلمانوں کو شامل کیا جائے گا۔ جبکہ اس اسٹڈی کے دوسرے مرحلہ میں "دا ابسولوٹ انسایٹ" کمیونٹی کے اہم قائدین کے ساتھ ان مسائل پر گفتگو کرے گا، تا کہ یہ سمجھا جا سکے کہ ان مسائل اور امور کے تعلق سے عام مسلمانوں اور ان کی آراء کے درمیان کیا فرق ہے۔

اگر آپ ہندوستانی مسلمانوں سے متعلق اہم مسائل پر اپنے خیالات شیئر کرنے میں دلچسپی رکھتے ہیں تو براہ کرم سروے کے لیے اس لنک پر کلک کریں۔ آپ کی اطلاع کے لئے یہ عرض ہے کہ سروے مکمل طور پر "دا ابسولوٹ انسایٹ" کے ذریعہ کیا جا رہا ہے، اس کا کسی بھی حکومتی یا ذاتی تنظیم اور ادارہ سے کوئی تعلق نہیں ہے۔ آپ کے ذریعہ فراہم کردہ معلومات پوری طرح محفوظ رکھی جائیں گی اور ان کا استعمال صرف مجموعی تجزیہ کے لیے کیا جائے گا تا کہ ان اہم امور کے تعلق سے ایک وسیع تر منظر نامہ تشکیل دیا جا سکے۔

اس سلسلہ میں کسی بھی وضاحت یا سوال کے لئے آپ ہم سے اس ایمیل پر ربط کر سکتے ہیں۔

[email protected]